Veurjoor
Den eenentwintigsten van meert
Muuj kieken noa ’n rook,
Want woer de wind dan daegens is
Is e ’t eerste veer’lnjoors ook
Van ’t joor hew ’t mooi etroffen,
De wind was zuud’lijk an
En as ’t noew gin good veurjoor wodt,
Weet ik der neet meer van.
’t Is buten gauw veraanderd,
’t Gung in nen vlook en ’n zucht,
En aj good lustert heur iej
Mangs weer brom in de luch.
De vruchtbeume dee knopt zoo mooi,
De stroeken wodt a greun.
De bleumpies wilt a bleuien,
Mar dee bint nog beteun.
De naekend’eersies, vlugge dinge,
Hebt ’t bleuien al edoan.
Noew zeej weer blouwselbleumpies
En pannekeukies staon.
Dee kiek oew toch zoo niejlijk an,
’t Is net of ze oew too lacht.
Joa, leve bleumpies, ’n besten zet
Hew eer op oew ewacht.
De veugelties dee fluit zoo mooi,
Wat zint ze toch weer nerig.
En allemoale hebt ze op tied
Eer nossien wel weer verig.
Nen getelink, door hoge in ’n boom,
Den fluit zien mooise leed.
Hee wil zien wiefien tookern,
Mar det smeugel kump nog neet!
Wil ´t wiefien nog neet kommen, jong
Aj ´t nog een keer weer vreugen.
Det geet ´t net as de vroaleu, dee
Hoalt ook van ´n bettien neugen.
Wat dut det veurjoor ´n meensche good!
De maakt oew weer zoo stark.
´t Is net oj volle better weer
Gewodden kont met ´t wark.
Al hej ook grieze heure
En rimples in de kop,
´t Is net oj niejs weer jonk wodt.
Iej fleurt der glad van op.
Of hej gen schik in ´t leven
Misschien hej volle verdreet.
Goat noew mar is nao buten,
`k Wedde det ´t dan better geet.
Aj door det veurjoor zeet en heurt,
Miej duch, det dot oew good.
Dan lik oew ´t leven wel weer mooi,
Dan kriej weer ´n bliej gemood
Johanna F.van Buren
